Godina Arsii Lixaatti poolisoonnii fi hidhattoonni qawwee hiikkataa manguddotti kennaa jiru

Hnaga ammatti qawween 70 oli harka manguddoo seenuun hubatameera

Godina Arsii Lixaa magaalaa fi baadiyaa heddu keessatti poolisoonnii fi hidhattoonni naannoo qawwee hiikkataa manguddotti laataa jiru. Hanga ammaatti magaalaa Seeroftaa, Kofalee, Kokkosaa fi Shaashamanneetti qawween 70 oli harka manguddoo seenuu gabaasni addaddaa agarsiisa. Godina kana keessatti waajjirri mootummaa, manniin kaabinee fi qabeenyi Woyyaanee tokko osoo hin hafin ibiddaan cilaawee jira. Humna Agaazii irraa heddu ajjeefamuunis hubatameera.
Sa’aa kanatti mootummaa wanti jedhu godina Arsii Lixaa keessa akka hin jirretu himama. Umanni sochii caasaa ufii tolfachutti seeneera.  Magaalaa fi baadiyaa heddu irraa ummanni walitti bayee yoo humni Agaazii gara naannoo isaanii dhufe ijoollee ufii irratti dhumuu fi gibira kaffalluu diddaa irratti walii galee jira.  Akkasumas miseensot OPDO gara godinaatti Agaazii masakanii fidanii fi  ganda keessa deemaa Qeerroo saxilan irratti tankaarfii hanga lubbuutti gayu fudhachuuf murteeffataniiru. 
Sa’aa kanatti gaafiin ummataa tokkoof tokko ta’eera: mootummaan Woyyaanee nu hin bulchu isa jedhu. Ammas hanga mootummaan kuni kufutti  gatii fedhe yoo kan isaan kaffalchiisus ta’es qabsoo eegalan cimsanii itti fufuudhaaf waadaa waliif seenanii gargara galan.